Laçın sakini: Şəxsi biznesimi qurmaq üçün mənə hər cür şərait yaradılıb

Laçın rayonunun sakini Azər Qarayev şəxsi biznesini qurmaq üçün bütün şəraitlə təmin edildiyini deyib.

O, "Report"un Laçına ezam olunmuş əməkdaşına açıqlamasında bildirib ki, yurduna geri döndükdən sonra Dövlət Məşğulluq Agentliyinə müraciət edib:

"Bir nasos, köpük aparatı, su aqreqatı, bir sözlə, avtoyuma üçün nə tələb olunursa, bütün avadanlıqlarla təchiz edildik. Eyni zamanda, biznesim üçün münasib ərazidə yer ayrıldı. Əslində Bakıda da bu işlə məşğul idim. Öz yurdumda işləmək böyük qürur mənbəyidir. Biznesim böyüdükcə gələcəkdə yeni əməkdaşlar da cəlb etməyi düşünürəm".

A.Qarayev həmçinin vurğulayıb ki, bir ildən sonra obyektdə xalçayuma bölməsinin fəaliyyətini də bərpa etməyi planlaşdırır.