Martda Azərbaycandan Gürcüstana pul köçürmələri 45% artıb

Bu ilin mart ayında Azərbaycandan Gürcüstana 2,4 milyon ABŞ dolları məbləğində pul köçürmələri həyata keçirilib ki, bu da ötən ilin eyni dövrü ilə müqayisədə 45,4% çoxdur. 

“Report”un yerli bürosu xəbər verir ki, bu barədə Gürcüstan Milli Bankından bildirilib.

Gürcüstana xarici ölkələrdən daxil olan pullarda Azərbaycanın payı 1,9% təşkil edib.

Ötən ay Gürcüstandan Azərbaycana isə 1,1 milyon ABŞ dolları pul köçürülüb.

Hesabat ayında Gürcüstana xarici ölkələrdən, ümumilikdə, 125,9 milyon ABŞ dolları vəsait daxil olub. Bu, illik müqayisədə 12,5 milyon ABŞ dolları və yaxud 9% azdır.

Ay ərzində Gürcüstandan digər ölkələrə isə 20,4 milyon ABŞ dolları köçürülüb ki, bu da 1 il əvvələ nisbətən 10,1% çoxdur.