Mavrikinin sabiq prezidenti şəhərlərin layihələndirilməsi zamanı qadınların ehtiyaclarını nəzərə almağa çağırıb

Şəhər inkişafında gender bərabərliyi əhalinin bütün qruplarının ehtiyacları nəzərə alınmaqla şəhərlərin məqsədyönlü layihələndirilməsi və planlaşdırılması olmadan qeyri-mümkündür.

"Report" xəbər verir ki, bunu Mavrikinin ilk qadın prezidenti, biomüxtəliflik üzrə alim Əminə Qurib-Fakim Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində Qadınlar Assambleyasında bildirib.

"Söhbət şəhər mühitinin formalaşmasında qadınların təcrübəsi və baxışlarının böyük dəyərə malik olduğunun qəbul edilməsindən gedir", - o vurğulayıb.

Mavrikinin sabiq prezidentinin sözlərinə görə, təhlükəsiz və əlçatan ictimai məkanlar inklüziv şəhər inkişafının əsas elementlərindən biridir: "Yaxşı işıqlandırılmış ictimai yerləri, əlçatan infrastrukturu və inklüziv ictimai nəqliyyat sistemi olan bir şəhər təsəvvür edin. Bütün bu elementlər bütün insanların şəhərdə təhlükəsiz və əminliklə hərəkət etməsinə imkan verir".

O vurğulayıb ki, müasir şəhərlər sakinlərin müxtəlif ehtiyaclarını nəzərə almalı və hər bir insanda aidiyyət hissi formalaşdırmalıdır.

Qurib-Fakim həmçinin gender bərabərliyinin təşviqi üçün əlçatan mənzillərin vacibliyinə də diqqət çəkib: "Mənzillərin əlçatanlığı şəhərlərdə gender bərabərliyinin təşviq edilməsinin ən vacib hissəsidir. Bu cür tədbirlər qadınların üzərinə qeyri-mütənasib şəkildə düşən yükü azaldaraq, onlara öz mühitlərində tam şəkildə inkişaf etməyə imkan verə bilər".