Mara Kossu: İtaliya Dayanıqlı İnkişaf Məqsədlərinin lokallaşdırılması üçün milli platforma yaradır

İtaliya bələdiyyə, regional və dövlət strukturları arasında çoxsəviyyəli əməkdaşlığa əsaslanan Dayanıqlı İnkişaf Məqsədlərinin lokallaşdırılması üçün milli sistemin yaradılması üzərində işləyir.

"Report"un məlumatına görə, bu barədə İtaliyanın Ətraf Mühit və Enerji Təhlükəsizliyi Nazirliyinin nümayəndəsi Mara Kossu Bakıda WUF13 çərçivəsində keçirilən tədbirdə videomüraciətində bildirib.

Onun sözlərinə görə, İtaliya UN-Habitat ilə birlikdə şəhərlərə və aqlomerasiyalara dayanıqlı inkişaf sahəsində birgə həll yolları hazırlamağa kömək etməli olan xüsusi platforma hazırlayır.

"Siyasi uzlaşma - sadəcə bir prinsip deyil, müxtəlif idarəetmə səviyyələrini və inteqrasiya olunmuş planlaşdırmanı özündə birləşdirən bir iş metodudur", - deyə o qeyd edib.

Kossu yerlərdə dayanıqlı inkişaf gündəliyinin səmərəli şəkildə həyata keçirilməsinin əsas şərti kimi milli hökumətlərlə metropoliten əraziləri arasında qarşılıqlı əlaqələrin gücləndirilməsinin vacibliyini xüsusilə vurğulayıb.