Qazaxıstanda daşqınlar səbəbindən təxliyə edilənlərin sayı 108 mini keçib

Qazaxıstanda daşqınlar başlayandan bəri 38 706 uşaq daxil olmaqla 108 200 insan təxliyə edilib.

“Report” Qazaxıstan KİV-ə istinadən bildirir ki, bu barədə ölkənin Fövqəladə Hallar Nazirliyi məlumat yayıb.

Bildirilib ki, 5411 fərdi yaşayış binası və 1607 həyətyanı sahə su altındadır.

Qeyd edilib ki, 12 minə yaxın insan öz evlərinə qayıdıb.

Xatırladaq ki, mart ayında başlayan daşqınlar səbəbindən Qazaxıstanın 8 regionunda yerli səviyyədə fövqəladə vəziyyət elan olunub. Xilasetmə işlərinə 35 mindən çox insan, 4 min texnika və 17 təyyarə cəlb olunub.