Salome Zurabişvili azərbaycanlıların və digər millətlərin prezidenti olmaqdan fəxr etdiyini bildirib

“Gürcüstanın müstəqilliyi ölkənin müxtəlifliyinə də əsaslanır”.

“Report”un yerli bürosu xəbər verir ki, bunu Gürcüstan Prezidenti Salome Zurabişvili Müstəqillik gününə həsr olunmuş mərasimdə çıxışı zamanı deyib.

O, bildirib ki, Gürcüstanın müxtəlifliyi ölkənin gücüdür: “Əsrlər boyu bir çox çətinliklər və saysız düşmən hücumlarına baxmayaraq, Gürcüstanda tolerantlıq ənənəsi qorunub saxlanır. Mənim üçün gürcü, abxaz, osetin, kürd, azərbaycanlı, yezid, erməni və ölkədə yaşayan digər millətləri təmsil edənlərin prezidenti olmaq böyük fəxr və məsuliyyətdir”.

S.Zurabişvili qeyd edib ki, ölkədə yaşayan bütün milli azlıqların milli mənsubiyyəti, mədəniyyəti, dili və adət-ənənələri tanınır və qorunur.