Energetika Nazirliyi: Tacikistanda elektrik enerjisinin verilişi tam bərpa olunub

Tacikistanın enerji sistemində yaranmış problem tamamilə aradan qaldırılıb, ölkənin bütün regionlarında elektrik təchizatı bərpa edilib.

"Report" xəbər verir ki, bu barədə Tacikistanın Energetika və Su Ehtiyatları Nazirliyi məlumat yayıb.

Qurumdan qeyd ediblər ki, fəsadların aradan qaldırılması üçün operativ tədbirlər görülüb və mövcud olan bütün resurslar səfərbər edilib.

"Hazırda ölkənin enerji sistemi normal rejimdə işləyir və istehlakçıların elektrik təchizatı tam bərpa olunub. Bununla yanaşı, enerji sisteminin sabit və etibarlı işləməsini təmin etmək üçün zəruri işlər davam etdirilir", - məlumatda deyilir.