Nazir: Müxtəlif ölkələrdən Azərbaycanın milli irsinə aid qiymətli kitabların gətirilməsinə çalışırıq

Mədəniyyət Nazirliyi Gürcüstanda və başqa ölkələrdə Azərbaycanın milli irsinə aid qiymətli kitabların orijinal nüsxələrini gətirmək üçün çalışır.

"Report" xəbər verir ki, bunu mədəniyyət naziri Adil Kərimli Milli Məclisin Mədəniyyət Komitəsinin "Kitabxana sisteminin mövcud vəziyyəti və inkişaf perspektivləri" mövzusunda keçirilən ictimai müzakirədə deyib.

Onun sözlərinə görə, bu istiqamətdə ikitərəfli müqavilələr çərçivəsində müəyyən addımlar atılır:

"Bizim üçün milli sərvət hesab olunan dəyərli əsərlərimizin ölkəyə gətirilməsi, yaxud muzey fondlarımızın zənginləşdirilməsi istiqamətində işlər gedir. Xüsusilə də Azərbaycan Milli Kitabxanası bu məsələdə çox fəaldır".