“InvestAZ”dan dünya maliyyə bazarları ilə bağlı həftəlik analiz

Amerikada “NFP”, avrozonada, İngiltərədə və Yaponiyada ÜDM göstəriciləri

"InvestAZ İnvestisiya Şirkəti" QSC-nin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

Avropada proqnozların çox üzərində açıqlanan inflyasiya göstəriciləri fonunda ötən həftənin sonuna doğru ucuzlaşan və həftəni enişlə tamamlayan dollar indeksində (DXY) tendensiyanın necə formalaşacağında bu həftə Amerikada açıqlanacaq əmək bazarına dair statistik göstəricilər, xüsusilə də “NFP” rəqəmləri, eləcə də avrozonada, İngiltərədə və Yaponiyada dərc olunacaq iqtisadi inkişaf səviyyəsinə dair rəqəmlər həlledici rol oynaya bilər.

Vurğulamaq istərdik ki, ötən həftənin cümə günü ticarət həftəsinin sonuna doğru ABŞ Federal Ehtiyatlar Sisteminin (FED) faiz artımlarını hələ uzun müddət davam etdirəcəyinə dair ehtimallar daha da qüvvətləndi. Beləki, FED inflyasiyanın azaldılması istiqamətində qərarlı olduğunu bir daha bəyan edərək, faiz artımlarının davam etdirilməsinin məqsədəuyğun olacağını bildirib.

FED-in ABŞ Konqresi üçün hazırladığı və ildə iki dəfə Konqresə təqdim etdiyi yarımillik Pul Siyasəti Hesabatının mart sayı dərc olunub.

FED sədri Jerom Pavelin bu həftə Konqresə təqdim edəcəyi hesabatda keçən ilin iyun ayı bəri bir il əvvəlki rəqəmlərlə müqaiyəsədə görə əhəmiyyətli maliyyə şərtləri və şəraitinin olduqca daha sərt olduğu bildirilib.

Hesabatda keçən ilin ortalarından etibarən tədarük kəsintilərinin azalması və enerji qiymətlərinin ucuzlaşması nəticəsində inflyasiyanın yavaşladığına diqqət çəkilsə də, inflyasiyanın Federal Açıq Bazar Komitəsinin (FOMC) 2 %-lik hədəfinin çox üzərində qaldığı qeyd edilib.

EUR

Ötən həftə avrozonada və Almaniyada açıqlanan inflyasiya və əmək bazarına dair göstəricilər, həmçinin cümə axşamı dərc olunan Avropa Mərkəzi Bankının son toplantısının protokolları avronun dollar qarşısında bahalaşmasına dəstək oldu. Bu həftə Amerikada açıqlanacaq əmək bazarına dair göstəricilər, xüsusilə də “NFP” rəqəmləri proqnozları qabaqlasa, EUR/USD məzənnəsi yenidən eniş tendensiyasını bərpa edə bilər. Təhlillərə əsasən dollar indeksindəki artım tendensiyası güclənərsə, avro dollar qarşısında 1,05 ABŞ dolları hədlərinə qədər ucuzlaşa bilər.

Qeyd edək ki, Avropa Mərkəzi Bankının sədri Kristin Laqardın həftənin çərşənbə və cümə günləri baş tutması gözlənilən çıxışları da investorların diqqət mərkəzində olacaq.

GBP

Ötən həftəni 1,2040 hədlərində tamamlayan GBP/USD məzənnəsində trendin necə davam edəcəyinə bu həftə İngiltərədə dərc olunacaq iqtisadi inkişaf səviyyəsinə dair statistik göstəricilər ciddi təsir edə bilər.

GOLD

DXY-ın 104,85 bənd hədlərində müqavimətlə qarşılaşaraq geriləməsi fonunda qızıl 1 855 ABŞ dollarına kimi bahalaşdı. Təhlillərə əsasən bu həftə Amerikada açıqlanacaq əmək bazarına dair göstəricilər, xüsusilə də “NFP” rəqəmləri proqnozları qabaqlasa, qiymətli metalın bir unsiyasının dəyəri yenidən 1 841 ABŞ dollara və 1 830 ABŞ dollara kimi ucuzlaşa bilər.

Qeyd edək ki, bu həftə həmçinin Yaponiya və Avstraliya Mərkəzi Banklarının faiz qərarları və keçiriləcək mətbuat konfransları, eləcə də Yaponiyada dərc olunacaq ÜDM göstəriciləri dolların major valyutalar qarşısında qiymətlərinə ciddi təsir edə bilər.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvestAZ İnvestisiya Şirkəti” QSC-nin

Analitika Departamenti

“İnvestAZ İnvestisiya Şirkəti”nin fəaliyyətini Azərbaycan Mərkəzi Bankı tənzimləyir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərir.

Risk bildirişi

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvestAZ İnvestisiya Şirkəti” yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.