Lens Cey Braun: Şəhərlərin bərpasını yalnız inşa edilmiş evlərin sayına görə qiymətləndirmək olmaz

İqlim dəyişiklikləri, silahlı münaqişələr, məcburi miqrasiya və təbii fəlakətlər dünyada yaşayış yerlərinin itirilməsinin və evsizlərin sayının artmasının əsas səbəblərindən birinə çevrilir.

"Report" xəbər verir ki, bu barədə "Habitat Professionals Forum"un həmsədri Lens Cey Braun Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən tədbirdə bildirib.

Onun sözlərinə görə, bəşəriyyət bu gün çoxsaylı misli görünməmiş qlobal böhranlar yaşayır. Burada ekoloji tənəzzülün, kəskin sosial bərabərsizliyin və mənzil qeyri-sabitliyinin nəticələri eyni vaxtda kəsişir, bu da böyük əhali kütlələrinin sürətli yerdəyişməsinə gətirib çıxarır.

Lens Cey Braun qeyd edib ki, "Recovering the Future" beynəlxalq konsepsiyası fəlakətlərin nəticələrinin aradan qaldırılmasına prinsipial olaraq yeni baxış təklif edir:

"Şəhərlərin bərpasına sadəcə fövqəladə hala təcili reaksiya kimi deyil, daha təhlükəsiz, ədalətli və ekoloji məkan yaratmaq üçün unikal imkan kimi baxılmalıdır. Yenidənqurma prosesi heç bir halda keçmişin həssaslıqlarını təkrarlamamalıdır. Onun məqsədi landşaft yönümlü planlaşdırma və vətəndaşların özlərinin fəal iştirakı əsasında icmaların uzunmüddətli transformasiyasıdır. Bununla yanaşı, forum nümayəndəsi xüsusi olaraq bildirib ki, bərpa işlərinin uğurunu qətiyyən yalnız inşa edilmiş binaların sayına görə qiymətləndirmək olmaz".

Həmsədr qeyd edib ki, keyfiyyətli yenidənqurma insana əsas sosial xidmətlərə maneəsiz çıxışı və təkrar yerdəyişmədən etibarlı müdafiəni təmin etməlidir.