"Yuventus" "Valensiya"nın müdafiəçisini transfer edib

Bakı. 27 iyun. REPORT.AZ/ İspaniyanın "Valensiya" klubunun müdafiəçisi Joau Kanselu karyerasını İtaliya "Yuventus"unda davam etdirəcək.

“Report” xəbər verir ki, bu barədə İtaliya klubunun rəsmi saytı məlumat yayıb.

Bildirilir ki, 24 yaşlı portuqaliyalı futbolçu 30 iyun 2023-cü ilə qədər Turin komandası ilə müqavilə imzalayıb.

"Yuventus"un mətbuat xidmətinin məlumatına görə, klub oyunçuya görə "Valensiya"ya 40,4 milyon avro ödəyəcək. Turinlilər bu məbləği növbəti üç ildə bir neçə dəfəyə ödəyəcəklər.

Kanselu ötən mövsümü icarə əsasında İtaliya "İnter"ində keçirib. O, 26 oyunda 1 dəfə fərqlənməyi bacarıb və 3 məhsuldar ötürmə edib.