"SOCAR Balakhani" şirkəti yaradılıb

Azərbaycan Dövlət Neft Şirkətinin (SOCAR) "Balaxanı-Sabunçu-Ramana və Kürdəxanı yataqlarının daxil olduğu blokun bərpası, işlənməsi və hasilatın pay bölgüsü haqqında Saziş"in tələblərinə uyğun olaraq yeni şirkət - "SOCAR Balakhani" MMC-ni yaradıb.

"Report"un əldə etdiyi məlumata görə, yeni kommersiya qurumu bu il iyunun 19-da SOCAR-la eyni hüquqi ünvanda Bakı şəhəri, Nərimanov rayonu, Heydər Əliyev prospekti, 121-də dövlət qeydiyyatına alınıb.

Onun nizamnamə kapitalı 1 000 manat, qanuni təmsilçisi isə Bağırov Natiq Orucqulu oğludur.

O, 1978-ci ildə anadan olub, gologiya-mineralogiya elmləri üzrə fəlsəfə doktorudur.

N.Bağırov 2010-2017-ci illərdə SOCAR-ın baş ofisində Xaricilərlə birgə aparılan kəşfiyyat və yataqların işlənməsinə nəzarət şöbəsinə rəhbərlik edib, 2018-2024 cü illərdə "SOCAR Upstream Management International" şirkətində İcraçı direktorun əməliyyatlar və strateji planlama üzrə müavini vəzifəsində çalışıb. O, 2019-cu ildə neft sənayesinin inkişafında xidmətlərinə görə "Tərəqqi" medalı ilə təltif edilib.

Cəmiyyətin yaradılmasında əsas məqsəd Sazişin tələbləri çərçivəsində podratçı qismində çıxış edəcək SOCAR-ın ortaq neft şirkətinin Saziş üzrə müəyyən edilmiş İştirak Payı həddində hüquq və öhdəliklərinin icrasını təmin etməkdir. Şirkət Balaxanı-Sabunçu-Ramana və Kürdəxanı yataqlarının daxil olduğu blok üzrə Saziş çərçivəsində SOCAR-ın ortaq neft şirkəti kimi fəaliyyət göstərəcək və müəyyən edilmiş iştirak payı çərçivəsində müvafiq hüquq və öhdəlikləri həyata keçirəcək.