BTC ilə neft ixracı mayda 6 % azalıb

Bakı-Tbilisi-Ceyhan (BTC) boru kəməri ilə neft ixracı bu ilin may ayında gündəlik orta hesabla 568 min barel təşkil edib.

"Report" xəbər verir ki, bu məlumatlar OPEC-in aylıq hesabatında göstərilib.

"May ayında aprellə müqayisədə Bakı-Tbilisi-Ceyhan boru kəməri ilə ixrac 6 % və ya gündəlik 37 min barel azalaraq sutkada 568 min barel təşkil edib", - neft kartelinin hesabatında qeyd olunur.

Ötən ilin may ayı ilə müqayisədə isə BTC ilə neft nəqli 4,5 % və ya gündəlik 27 min barel azalıb.

Xatırladaq ki, kəmərin açılışı 2006-cı il iyul ayının 13-də baş tutub. Onun uzunluğu 1 768 kilometrdir: 443 km-i Azərbaycan, 249 km-i Gürcüstan və 1 076 km-i Türkiyədən keçir.