Xaricdə yaşayan ukraynalılar seçkilərdə səs verməyə başlayıblar

Martın 31-də Ukraynada prezident seçkiləri çərçivəsində xaricdə yaşayan vətəndaşlar üçün səsvermə başlayıb.

"Report" UNİAN-a istinadən xəbər verir ki, ilk səsvermə Avstraliyada başlayıb. Sonuncu səsvermə isə aprelin 1-də Ukraynanın yerli vaxtı ilə səhər saat 6-də San-Fransiskoda baş tutacaq.

Xaricdə olan ukraynalı seçicilər dünyanın 72 ölkəsində mövcud olan 101 seçki məntəqəsində səs verə biləcəklər. Ukraynada keçirilən prezident seçkiləri ilə əlaqədar Azərbaycanda da məntəqə seçki komissiyası fəaliyyətə başlayıb. Belə ki, Azərbaycan ərazisində olan Ukrayna vətəndaşları 31 mart 2019-cu il tarixində saat 08:00-dan 20:00-dək səs verə biləcəklər.