Pakistanda son sutkada rekord sayda yoluxma qeydə alınıb

Pakistanda son sutka ərzində 5 834 nəfər yeni növ koronavirusa yoluxub. Bununla da ölkədə ümumi yoluxma hallarının sayı 119 536-ya çatıb.

“Report” "RİA Novosti"yə istinadən xəbər verir ki, bu barədə ölkənin Səhiyyə Nazirliyi məlumat yayıb.

Məlumata görə, son sutkada 101 nəfər virusun qurbanı olub. Ümumilikdə koronavirus 2 356 nəfərin ölümünə səbəb olub. Eyni zamanda 38 391 nəfər virusdan sağalaraq evə buraxılıb.

Xatırladaq ki, bir müddət əvvəl Pakistanın baş naziri İmran Xan ölkədə koronavirusa yoluxmanın iyul-avqust aylarında pik nöqtəyə çatacağını bildirmişdi.

Qeyd edək ki, Pakistan hökuməti mayın 9-da tikinti şirkətlərinə, dar profilli tibb şöbələrinə, bazarlara və dükanlara işləməyə icazə verməklə müəyyən məhdudiyyətləri aradan qaldırıb. Ciddi sanitar tələblərə baxmayaraq, yeni yoluxma hallarının sayı artıb.