Maqnus Brunner: Seutadakı böhran Aİ-nin xarici sərhədlərinin dayanıqlığı üçün sınaq olub

Avropa İttifaqı (Aİ) ölkələrinin daxili işlər nazirləri Seutadakı miqrasiya böhranından sonra İspaniya ilə tam həmrəyliklərini ifadə ediblər.

"Report"un Avropa bürosunun verdiyi məlumata görə, bu barədə Aİ-nin daxili işlər nazirlərinin təcili videokonfransının yekunlarına əsasən daxili işlər və miqrasiya üzrə Avropa komissarı Maqnus Brunner deyib.

O qeyd edib ki, İspaniya hökumətinin məlumatına görə, ölkənin Şimali Afrikadakı anklavı olan Seutada vəziyyət nəzarət altındadır.

M.Brunner sözlərinə görə, Avropa Komissiyası artıq İspaniyaya maliyyə və operativ yardım göstərib: "Seutada "Frontex" agentliyinin 30-dan çox əməkdaşı işləyir. Vəziyyəti yenidən nəzarət altına almaq mümkün oldu. Bu, təsadüfən baş vermədi - bu, bizim birgə hərəkət etməyimizin nəticəsidir", - komissar bildirib.