Hindistanın paytaxtında iğtişaşlarda 10-a yaxın polis xəsarət alıb, saxlanılanlar var

Hindistanın paytaxtı Nyu-Dehlidə hindu və müsəlman gənclərdən ibarət qruplar arasında toqquşma baş verib.

"Report" bu barədə NDTV telekanalına istinadən xəbər verir.

Məlumata görə, toqquşmalarda səkkiz polis yaralanıb, bir polis müfəttişi güllə yarası alıb, mülki şəxslər arasında isə xəsarət alanlar var.

Hüquq-mühafizə orqanları tərəfindən 20-dən çox iğtişaşçı da saxlanılıb.

Daxili İşlər Nazirliyi vəziyyətin xüsusilə gərgin olduğu Noida və Qaziabad şəhərətrafı ərazilərinə 10 mindən çox polis yerləşdirib. Hakimiyyət 2020-ci ilin fevralında paytaxtın şimal-şərqində baş vermiş və 53 nəfərin ölümü ilə nəticələnən məzhəblərarası toqquşmaların təkrarlanmasından ehtiyat edir.