Gürcüstan Türkiyədən dərman idxal edəcək

Gürcüstan Türkiyədən yüksək keyfiyyətli dərman preparatları idxal edəcək.

“Report”un yerli bürosu xəbər verir ki, bu barədə ölkənin Baş naziri İrakli Qaribaşvili hökumətin iclasında deyib.

Onun sözlərinə görə, Gürcüstan əczaçılıq bazarının Türkiyə üçün açılması ilə bağlı qərar artıq imzalanıb.

Qeyd edək ki, Gürcüstanda son illər medikamentlərin qiymətində artım müşahidə olunur. Türkiyədən dərman idxalının hesabına daxili bazarda medikamentlərin qiymətinin aşağı düşəcəyi gözlənilir.

Gürcüstan dərman preparatlarını əsasən Avropa ölkələri, Rusiya, Hindistan və Belarusdan tədarük edir. Yerli istehsal dərmanlarının bazarda payı 13 % təşkil edir.